Jákvæð og neikvæð hugsun />

Komið þið sæl kæru lesendur! Ég ákvað að deila með ykkur þessum frábæra texta úr bókinni Þú ert það sem þú hugsar eftir Guðjón Bergmann. Ég var að lesa þetta núna á sunnudaginn og fannst ég knúin að bera þennan boðskap áfram. />

Marta Washington, eiginkona George Washington komst svo að orði: „Ég er ákveðin í að vera jákvæð og hamingjusöm, hverjar sem aðstæðurnar eru, því ég hef lært af eigin reynslu að stór hluti af hamingju okkar og að sama skapi vansæld byggist á viðhorfi á okkar en ekki kringumstæðum“. />

Guðjón Bergmann vinnur út frá eftirfarandi skilgreiningu á jákvæðni í þessari bók. Hann tekur sérstaklega fram að líkt og með allar skilgreiningar sé hér á ferðinni ákveðin vísbending en ekki endanleg niðurstaða. „JÁKVÆÐNI; er að hugsa um lausnir, möguleika, tækifæri, markmið og drauma“. Ég er mjög sammála þessari skilgreiningu hjá honum. Sérstaklega hlutanum að hugsa í lausnum. Ég fór á námskeið hjá Kára Eyþórssyni haustið 2006, sem fjallaði í stuttu máli um að vekja snillinginn í sjálfum sér og að hugsa í lausnum (ef þið hafið áhuga, sjá nánar www.ckari.com). Þessi lausnamiðaða hugsun hefur komið mér mjög langt, þá sérstaklega þegar kemur að veikindunum mínum. Var því kærkomið að fá þessa upprifjun við lesturinn á bókinni. />

„Þeir sem eru jákvæðir hugsa einfaldlega meira um lausnir en þeir hugsa um vandamál, möguleika í stað þess að hugsa stöðugt um fyrirstöður, tækifæri í stað erfiðleika og þeir beina athygli sinni að draumum sínum og markmiðum. Jákvæð manneskja byrjar alltaf að leita lausna eftir að hún hefur skilgreint fyrirliggjandi vandamál (verkefni). Jákvæð manneskja gerir sitt besta til að finna möguleika og betri tækifæri. Jákvæð manneskja þarf ekki alltaf að vera brosandi, segjandi brandara eða horfa framhjá því neikvæða. Hún getur jafnvel verið pirruð og reið, en strax og hún byrjar að hugsa um lausnir og tækifæri þá er hún orðin jákvæð. Jákvæðni felst ekki í því að halda að lífið sé auðvelt, heldur að njóta lífsins þrátt fyrir erfiðleika, takast á við áskoranir uppfullur af von og sjá möguleika þar sem aðrir sjá enga. Maður verður að geta séð tækifærin þegar á móti blæs“. />

Lífið getur verið erfitt, en það þýðir ekki að það sé leiðinlegt, hræðilegt eða óttalegt, bara erfitt. Ég kom inná þennan punkt í pistli nr.2 sem ég skrifaði, þetta er viðhorf sem ég hef lifað eftir sem að faðir minn kenndi mér á sínum tíma. />

„Ef gengið er út frá því að lífið sé erfitt þá kemur fátt á óvart. Hægt er að gera ráð fyrir því að hrasa, detta og jafnvel verða sleginn niður. Jákvæðni felst í viðbrögðum við slíkum viðburðum en ekki viðburðunum sjálfum. Ef við getum séð upp, þá getum við staðið upp. Jákvæðni felst ekki í afneitun, t.d því að horfast ekki í augu við augljósa skapgerðarbresti eða yfirþyrmandi vandamál, heldur felst jákvæðni í því að sjá leiðir og tækifæri. Jákvæð manneskja segir; Ég veit að þetta er stórt vandamál, en hvað getum við lært? Hverjir eru möguleikarnir? Hugsum um lausnir, hugsum um tækifæri! Jákvæð manneskja hugsar um drauma sína og markmið sín í lífinu til þess að halda sér gangandi, til að finna innblástur og tilgang í heimi þar sem er auðvelt að dragast inn í neikvæða og niðurrífandi hegðun og umræðu. Jákvæðni felst í því að horfast í augu við hlutina eins og þeir eru, finna bestu mögulegu leið út úr ástandinu og fylgja henni síðan eftir“. />

Umfjöllunin í fréttunum hefur ekki beint verið á jákvæðu nótunum, enda alvarlegt ástand í gangi. Við verðum samt að halda áfram að lifa lífinu, herða beltisólina aðeins og einblína á það jákvæða. Ég geri mér grein fyrir að margir hafa misst miklar fjárhæðir og það sé ekki auðvelt að takast á við það. Allt er þó hægt ef viljinn er fyrir hendi! />

Ég ætla að enda pistilinn á að hrósa þeim á Skjá 1 fyrir frábært framtak! Þeir eru búnir að birta viðtöl við fullt af fólki sem bendir á jákvæðar hliðar á lífinu undir merkjum þess  að það besta í lífinu sé ókeypis. Ég kom inná þetta í síðasta pistli og vill undirstinga þetta aftur – ÞAÐ BESTA Í LÍFINU ER ÓKEYPIS! Þessi vísa verður ekki nógu oft kveðin. Njótið þess að vera með þeim sem standa ykkur næst og horfið fram á við. Leiðin liggur bara uppá við núna! />

> >

 Baráttukveðja til ykkar, Kristín Ósk Óskarsdóttir />

Hugsaðu jákvætt, það er léttara />

Kæru lesendur, ég vona innilega að Þjóðhátíðin hafi farið vel fram hjá ykkur öllum og þið skemmt ykkur jafn vel og ég gerði! Fyrsta geðorðið fjallar um að hugsa jákvætt og er við hæfi að tengja það við helgina sem nú er á enda. Ég hef alltaf sagt að veðrið í Dalnum sé hugarástand. Ég hef það fyrir reglu að mæta með sól í hjarta í Dalinn og einhvern veginn þá er alltaf gott veður hjá mér, sama hvernig viðrar. Það er nefnilega svo að það er miklu auðveldara að hugsa jákvætt, samt er þetta ákveðin tækni sem maður þarf að tileinka sér. />

Fyrsta geðorðið snýst um hugarfar. “Samband milli hugsanna og tilfinninga er mjög sterkt. Ef við hugsum um eitthvað sorglegt verðum við sorgmædd og á sama hátt verðum við glöð þegar við hugsum um eitthvað ánægjulegt. Einfaldasta leiðin til að breyta því hvernig okkur líður hverju sinni getur verið að hugsa um eitthvað annað en það sem við vorum að hugsa” (Úr bókinni Velgengni og vellíðan, um geðorðin 10). Þetta er samt ekki alltaf svona einfalt og verðum við óneitanlega að taka það með í reikninginn að stundum þurfum við að leyfa okkur að finna til. Til dæmis er við missum náin vin eða aðstandanda, þá er eðlilegt að vera sorgmæddur og mikilvægt að fara í gegnum það ferli tilfinningalega séð. />

Það sem er einna mikilvægast, eins og ég hef komið inná nokkrum sinnum áður, er að vera meðvitaður um tilfinningar sínar. “Ef við erum vakandi fyrir því að við getum haft áhrif á líðan okkar með hugarfarinu öðlumst við ákveðið frelsi og það kemur í veg fyrir að við verðum fórnarlömb tilfinninga okkar”. Það er mjög slæmt fyrir okkur að festa okkur í fórnarlambs hugsuninni, hún getur haft svo slæm áhrif á líðanina hjá okkur. />

Jákvæð hugsun snýst ekki bara um að vera í góðu skapi. “Sálfræðingurinn Barbara Fredrickson hefur með rannsóknum sínum sýnt að þegar tilfinningar okkar eru jákvæðar erum við meira skapandi. Einnig hefur verið sýnt fram á að fólk sem finnur fyrir og greinir oft frá jákvæðum tilfinningum sé líklegra til að vera ánægt með lífið og eiga innihaldsríkari sambönd við aðra. Það er einnig afkastameira og ánægðara í vinnu, hjálpsamara við aðra og líklegra til að ná settum markmiðum í lífinu” (Úr bókinni Velgengni og vellíðan, um geðorðin 10). Mér fannst alveg magnað að lesa um þessa rannsókn. Ég er reglulega spurð hvort að ég sé alltaf svona jákvæð eins og ég legg upp með að skrifa um í pistlunum mínum??? Svarið er að mestu leyti já. Ég er búin að vinna svo mikið með þennan þátt í mínu lífi, jákvæðu hugsunina og hefur hún komið mér þangað sem ég er í dag. />

“Þetta fyrsta geðorð felur í sér að jákvæð sýn á lífið er undirstaða vellíðunar þegar á heildina er litið. Jákvætt viðhorf í eigin garð er lykillinn að góðri sjálfsmynd og sjálfsviðurkenningu. Með jákvæðri sýn á lífið reynist auðveldara að takast á við vandamál á uppbyggilegan hátt” (Úr bókinni Velgengni og vellíðan, um geðorðin 10). Ég er frjáls af því að finna til og minn sársauki felst kannski mest í verkjum og stundum örlitlu vonleysi samfara þeim. Málið er að ég kann orðið að tækla þetta og eins og segi alltaf; Á morgun kemur nýr dagur, með nýjum loforðum og það fleytir mér ansi langt get ég sagt ykkur. Munið því að hugsa jákvætt, það er svo miklu léttara! Jafnframt, þá getið þið alltaf fundið eitthvað pínulítið jákvætt á hverjum einasta degi. Smá bros, skítugur koss frá barni, fallegur dagur þar sem eyjan skartar sínu fegursta - það er ALLTAF hægt að finna eitthvað. />

Með þessum orðum kveð ég að sinni. />

Heilbrigð sál í hraustum líkama />

Komið þið sæl kæru lesendur! Hugurinn minn hefur hvarflað mikið að skrifum uppá síðkastið og fékk ég nokkrar hugmyndir að pistlum á meðan á dvöl minni stóð á Reykjarlundi. Einn af mínum uppáhaldsstöðum í Reykjavík er búðin Betra líf, sem er staðsett á 3. hæð Kringlunnar. Þar finn ég ALLTAF eitthvað sem höfðar til mín í það og það skiptið. Ég rambaði til dæmis á bók sem heitir Lögmál kærleikans og hlakka ég til að skrifa út frá henni. Þar sem ég er óttarlegur bókaormur, þá fór ég líka í bóksölu stúdenta og fann þar bók sem var skrifuð í kringum geðorðin 10, sem flestir kannast ef til vill við. Ég fékk segul sendan um árið með geðorðunum og hangir hann ennþá á ísskápnum og heldur stundaskránni hjá Hressó uppi fyrir mig. Þetta allt leiddi mig til þess að mig langar að skrifa meira um heilbrigði. Ég rækta hugann og andann með því að lesa uppbyggilegar bækur og vinna markvisst með tilfinningarnar mínar. Svo hreyfi ég mig mikið, þar sem það lætur mér einfaldlega líða betur! />

Heilbrigð sál í hraustum líkama, skilar okkur vellíðan og velgengni í lífinu. Geðheilsa er stór þáttur í því og hefur verið greind í eftirfarandi þætti samkvæmt bókinni Velgengni og vellíðan um geðorðin 10 eftir Dóru Guðrúnu Guðmundsdóttur: />

• Sjálfsviðurkenning />
• Persónulegur þroski />
• Jákvæð samskipti við aðra />
• Sjálfsstjórn />
• Tilgangur í lífinu />
• Stjórn á umhverfi sínu />

Þetta eru mikilvægir þættir fyrir hvern og einn til að miða sjálfan sig svolítið út frá þegar farið er í naflaskoðun. Mig langar til að telja einnig upp geðorðin 10 fyrir þá sem eru þeim ekki kunnugir og ætla ég að skrifa meira um hvert og eitt þeirra á næstunni. Geðorðin 10 eru: />

1. Hugsaðu jákvætt, það er léttara />
2. Hlúðu að því sem þér þykir vænt um />
3. Haltu áfram að læra svo lengi sem þú lifir />
4. Lærðu af mistökum þínum />
5. Hreyfðu þig daglega, það léttir lundina />
6. Flæktu ekki líf þitt að óþörfu />
7. Reyndu að skilja og hvetja aðra í kringum þig />
8. Gefstu ekki upp, velgengni í lífinu er langhlaup />
9. Finndu og ræktaðu hæfileika þína />
10. Settu þér markmið og láttu drauma þína rætast />

Ef við tökum fyrir geðorð 5 í dag - Hreyfðu þig daglega, það léttir lundina. />

Ég er búin að vera í mikilli hreyfingu síðustu sex vikur og hefur það óneitanlega hjálpað mér að halda dampi í gegnum verkina sem fylgdu samfara allri þessari hreyfingu. Jú stundum varð ég að slá af, þar sem ég hef lært að við þurfum að hlusta á líkamann og hann lætur okkur vita ef við erum að gera of mikið. Ég held líka að það sé eitt af því mikilvægasta í lífinu, ef við miðum það út frá hugtakinu; Heilbrigð sál í hraustum líkama, að hlusta á það sem hann er að segja okkur. “Flestir kannast við þá vellíðan sem fylgir því að taka á líkamlega. Í kjölfar slíkra átaka flæða hormón um líkamann sem veita okkur eftirsóknaverða og heilbrigða vellíðan. Reglulegri hreyfingu fylgja jákvæðar tilfinningar, bætt líðan, minni streita, sterkari sjálfsmynd og hún getur komið í veg fyrir geðheilsuvandamál. Möguleikarnir til að hreyfa sig reglulega eru margir. Sumum hentar vel að fara í líkamsræktarstöðvar, öðrum að fara út að ganga, í sund, á hestbak, í jóga eða hvað sem er. Það sem verður fyrir valinu er aukaatriði. Aðalatriðið er að finna hentuga hreyfingu og byrja sem fyrst því regluleg hreyfing virðist vera nauðsynleg fyrir heilsuna og geðheilsuna frá vöggu til grafar” (Úr bókinni Velgengni og vellíðan, um geðorðin 10). />

Þetta náttúrulega endorfín hefur hjálpað mér mikið og hvatt mig til að halda áfram. Ég hef nýtt mér einkaþjálfun hjá hinni einstöku Hafdísi Kristjánsdóttur og langar mig að nota tækifærið og þakka henni fyrir að meta nákvæmlega hvað það er sem ég þarf hvern dag. Þar sem ég kem oft í misjöfnu ástandi í hreyfinguna, þá er ómetanlegt að hafa einhvern sem kippir manni niðrá jörðina og lætur mann gera sitt besta það skiptið! Eftirá upplifi ég mig alltaf sem sigurvegara og það er frábær tilfinning. Göngur hérna um Eyjuna fögru gefa mér líka alltaf jafn mikið. Þessi einstaka náttúruperla er fjársjóður og eru það forréttindi að geta hreyft sig í svona fallegu umhverfi. Ég hvet ykkur því eindregið að fara að huga að því sem vekur áhuga ykkar, heilsan ykkar, líkamleg sem andleg mun njóta góðs af! />

Að lokum langar mig til að óska ykkur gleðiríkrar þjóðhátíðar, munið að ganga hægt um gleðinnar dyr. />

Kær kveðja ykkar Kristín Ósk />